28 09.2007-Êrîş QOSER - Dogan ÇETÎN / ANF
Mehmet Saît Yildirim ku JÎTEM’ê ew ji bo sîxuriyê şande Qadên Parastina Medya ji aliyê gerîlayên HPG’ê ve hate girtin. Yildirim di lêpirsîna xwe de bi berfirehî behsa detayên planên sûîkast û jehrdayîna rêveberên KCK’ê kir. Yildirim yek bi yek behsa rêbazên JÎTEM’ê yên ajantiyê kir. Yildirim got ku ew rastî gelek îşkenceyan hatiye û piştî ku wî ajantî qebûl kiriye jî ew hatiye perwerdekirin. Yildirim aşkera kir ku piştî hatiye perwerdekirin, cîhazekî sînyalan davêje li ser wî hatiye bicihkirin û ew çûye Qada Parastina Medya.

ÇAWA BÛ AJAN?
M. Saît Yildirim ku li gundê Uzunlara bi ser navçeya Haniya Amedê rûdine pêvajoya ajaniyê wiha vegot: “Di sala 2006’an de gerîla bi ser şantiyeyekê de girt û kesê bi navê Mehmet Kaçmaz jî esîr girt. Ez bûm navbeyinkar da ku Mehmet Kaçmaz serbest bê berdan. Dema min têkilî bi gerîliyan re danî xizmê min ê ligel min dîmenên min kişandin û ew dan JÎTEM’ê. Piştre ez revandim û ez tehdît kirim. Têkiliya min a bi JÎTEM’ê re dest pê kir.”

ÎŞKENCEYA GIRAN

Piştî ku M.Saît Yildirim ajanî qebûl kir, endamên JÎTEM’ê yên bi kodên Sakalli û Doktor Ahmet tên nasîn ew birin Biryargeha Leşkerî ya li Seyrantepeyê û ji wir jî birin Fermandariya Kolorduya 7’emîn a li Ofîsê. Piştre fermandarekî cilên leşkerî li ser ew teslîmî endamên JÎTEM’ê kir. Yildirim wiha got: “Îşkenceyên giran li min kirin. Ez ji ser xwe çûm. Dema hişyar bûm, di nava xwînê de mabûm. Nexşe anîn û ji min xwestin ku ez cihên gerîla nîşan bidim.”

DÎMENÊN HOVANE

Li avahiya MÎT’ê ya li Amedê dîmenên hovîtiyê nîşanî wî didin. Yildirim wiha behsa van dîmenan dike: “Gerîlayên jin ên ku birîndar di dîmenan de hebûn. Leşkeran tecawizî gerîlayên jin ên birîndar an jî yên jiyana xwe ji dest dane dikir. Hin mirov zindî zindî li du erebeyan ve dihatin girêdan û rakişandin. Di dîmenekê de hin mirov di malên wan de dihatin şewitandin û cenazeyên gerîla davêtin ser hev û pîştî ku mazot rijandin ser, ew dişewitandin.”

OPERASYONA EWIL

Piştî ku zelal bû ku dê Yildirim bi JÎTEM’ê re bixebite ew ji bo operasyona wî ya destpêkê tê amadekirin. Yildirim wiha behsa operasyona xwe ya yekemîn dike: "Ez teslîmî endamên MÎT’ê yên bi navên 'Ozan' û 'Kemal' kirim. Piştre di bin fermandariya Fatîh de me xwe ji bo operasyonê amade kir. 7 helîkopter li gel hev rabûn û ez jî xistim hundirê yek ji wan. Em çûn Licê û min cihên ku dizanîn nîşanî wan didan. Li jêr jî tevgereke mezin a leşkeriyê hebû.”

BI WALÎ RE CIVÎN

M. Saît Yildirim got piştî ajantiya wî fermî bû, MÎT’ê 3 rojan ew perwerde kirine û wiha pê de çû: “Em tevî 40-50 ajanan ketin perwerdehiyê. Min hin ji wan nas dikirin. Li ser sahneyê kesên ku perwerdehî dida hebûn. Li kêlekê jî mirovên girîng. Roja ewil Waliyê Amedê Efkan Ala jî li wir bû. Ew jî li ser tiştên ku dê li Amedê di nava gel de bên kirin ji me re vegotin. Heta wî behsa rêbazên ketina nava çalakiyan jî kir. Li ser rêbazên tahrîkirina gel jî sekinî.”

QADA NÛ: BAŞÛR

M. Sait Yildirim piştî ku bawerî da JÎTEM û MÎT’ê ji bo wî pasaportek taybet tê derxistin û wî dişînin başûrê Kurdistanê. Ji Yildirim tê xwestin ku der barê tiştên di dema dawî de li Qendîlê pêk tên agahiyan bide. Li gorî plana bi navê ‘Daralînk’ dê cihên rêveberên pêşeng ên KCK’ê bihata tespîtkirin û li dijî wan êrîşên hewayî pêk bihata. Ji bo vê yekê jî di warê teknîk de M. Saît Yildirim hate amadekirin û ew şandin Mexmûrê û derbasî Qadên Parastina Medya bû.

JI BO CIHÊ RÊVEBERAN SÎNYAL

Ajanê bi navê M. Saît Yildirim, anî ziman ku ew ji bo gelek peywiran şandine Qadên Parastina Medya. Yildirim wiha behsa peywira xwe dike: “Armanca min ew bû ku bi sînyalan cihên rêveberên KCK’ê aşkera bikim û rê li ber êrîşeke asîmanî vebikim. Her wiha cihên ku çekên giran lê hene jî min dê bi sinyalan diyar bikira. Heke ez tengav bibam jî min ê xwe bigihanda endamên JÎTEM’ê yên li başûrê Kurdistanê. Yildirim piştî ku çû Qadên Parastina Medya hê perwira xwe bi cih neanî ji aliyê gerîlayên HPG’ê ve hate girtin.