Azadiya Welat-Pastarên Îranê ku li hemberî gerîlayên PJAK’ê şikestekên mezin dixwin, ji bo ku têkiliya gel û gerîlayan ji hev qut bikin, zilm û zordariya xwe ya li ser gundiyan zêde kirin. Dewleta Îranê ku bi biryara darvekirina rojnamegerên kurd û endamê PJAK’ê Hîkmet Demîr êrîş û zextên xwe yên li ser kurdan bilind dike, niha jî ambargo datîne ser gundiyan.
Li gorî agahiyên ku hatin bidestxistin li herêma Urmiye û Selmasê, bi hinceta ku alîkarî didin gerîlayên PJAK’ê dewlet nahêle ku zexîre bikeve 70 gundan. Her wiha dewleta Îranê li 3 gundên herêma Şipranê jî ambargoya zexîreyê danî ser gundiyan. Heta niha dewletê li hemû gundan şekir, rûn, mazot û gelek zexîre belav dikir. Lê ev 10 roj in ku dewlet êdî zexîre nade gundiyan û dixwaze wan bi birçîbûnê terbiye bike.

QEDEXE ZÊDE DIBIN

Riyên çiyê ku gundî ji bo anîna zexîr û pêdiviyên xwe bi kar tîne jî hate qedexekirin. Her wiha wesayîtên ku ji bo lazimiyên gundiyan berê xwe didin navçe û bajarokan jî têne astengkirin. Heta niha bi dehan wesayît ji aliyê pastaran ve paşve hatin vegerandin. Gundiyên ku ji bo jiyana xwe bidomînin pêdiviya wan bi ka, ce, giya, çîmento û pirêketan heye jî têne astengkirin. Dewletê van tiştan jî li gundiyan qedexe kir. PJAK’ê der barê mijarê de nirxandinek kir. PJAK’ê bal kişand ku Îran dixwaze gelê kurd bi birçîbûnê terbiye bike.

TOPEBARAN DIDOME

Li gorî agahiyên ku hatin bidestxistin pastarên Îranê bi bi katûşayan herêma navçeyên Xatûn, Derî Melazede, Serî Paye û Warşengêya Haci Umranê da ber topan. Artêşa Îranê ku topebarana li hemberî gerîlayên PJAK’ê didomîne, di vê topebaranê de hin qaçaxçî xistin kemînê. Ji ber ku di topebaranê de tiştek bi gerîlayan nebû, leşkeran kerb û hêrsa xwe ji serê qaçaxçiyan derxistin û hespek gulebaran kirin.

09.08.2007