Ajovanê kamyonê Ahmet Kaymaz û kurê wî yê 12 salî Ugur Kaymaz ku li Qosera Mêrdînê di encama operasyona polîs û leşkeran de hatin kuştin, îro bi tevlîbûna sedan kesî hate veşardin. Di dema cenazeyê de dirûşmên wekî, "Kujerên zarokan, dê hesab bidin", "HPG biçe eniyê, ber bi misîlemeyê", "PKK, gel e, gel jî li vire" û "Kujer Dewlet" hate berzkirin. Her wiha di meşê de alên KONGRA-GEL hatin vekirin.

Cenazeyên ajovanê kamyonê Ahmet Kaymaz (31) û kurê wî yê 12 salî Ugur Kaymaz, piştî ku duh êvarê birin Morga Adlî Tipa Amedê, îro anîn Mizgefta İdrîsê û li vir hatin şuştin. Cenaze piştre ji bo veşartinê birin Goristana Taxa Ataturkê. Bi sedan kes li Qoserê beşdarî cenazeya Ahmet Kaymaz û kurê wî Ugur Kaymaz bûn. Kesên ku beşdarî cenazeyê bûn, bi qasî 3 kîlometreyan, heta Goristana ku li Taxa Ataturkê ye, meşiyan û di dema meşê de dirûşmên wekî, "Kujerên zarokan, dê hesab bidin", "HPG biçe eniyê, ber bi misîlemeyê", "PKK, gel e, gel jî li vire" berzkirin. Di meşê de alên KONGRA-GEL hatin vekirin. Piştî ku girsê gihişt ser goristanê, dûrişma "Kujer Dewlet" berz kir.
'Şagirtek 12 salî kirin terorîst'
Li ser goristanê piştî ku deqeyek rêz hate girtin, Serokê Rêxistina DEHAP'a Mêrdînê Cemal Veske axaftinek kir. Veske got: "Şagirtê me Ugur, di çalakiyên me de her tim helbestên aştiyê dixwend. Şagirtek 12 salî çawa dikin 'terorîst'." Veske bang li raya giştî kir û got: "Kî kujerê zarokan e, îro dîsa derket holê. Bila bên û bi çavên xwe bibînin." Veske bang li Serokwezîr Recep Tayyîp Erdogan kir û wiha got: "Waliyê Mêrdînê duh êvarê daxuyaniyek da çapemeniyê û got 'Duh êvarê li navçeya Qoserê 2 terorîst hatine kuştin'. Gelo hûn şagirtek çawa dikin 'terorîst'. Ew heta du roj berê jî, diçû dibistana we." Veske xwest ku Waliyê Mêrdînê û Parlementerên Tirkiyeyê bêne Qoserê û der barê bûyerê lêkolîn bikin.
Emîne Kaymaz: Dema ku bûyer pêk hat mamosteyê neviyê min jî li wir bû Dayika Ahmet Kaymaz, Emîne Kaymaz li ser bûyerê ji DÎHA'yê re axifî û wiha got: "Kurê min û neviyê min ji bo ku biçin Îskenderûnê alavên xwe amade dikirin. Di saet 17.00'an de derketin derve. Piştî ku ew derketin, dengên çekan hatin. Em di heman demê de derketin derve. Li vir lawê min û neviyê min hatibûn kuştin. Mamosteyê neviyê min jî li wir bû û ji polîsan re digot 'ev zarok şagirtê min e, hûn çawa jê re dibêjin terorîst'." Kaymaz xwest ku bila mamoste û cîranê wan ji bo vê bûyerê bibin şahîd. Kaymaz dawiya bûyerê jî wiha bi lêv kir: "Polîsan di hundirê mala me de lêgerîn pêkanîn. Ez û bûka min Makbule Kaymaz binçavkirin. Di laşên kur û neviyê min de şopa bi dehan guleyan hebûn û ew di nava xwînê de mabûn. Ez dixwazim kiryarên kur û neviyê min bêne dîtin". Du kesên ku duh êvarê di çapemeniya tirk de wekî 'terorîst' hatin nîşandan, yek jê ajokarê kamyonê yê bi navê Ahmet Kaymaz û kurê wî yê 12 salî Ugur Kaymaz e. Ugur Kaymaz, li navçeya Qoserê pola 5'emîn a Dibistana Seretayî ya Dîcleyê.