Platforma Demokrasiyê ya 21 bajaran ku ji 330 saziyên sivîl pêk tê daxuyaniyeke hevbeş da çapemeniyê. Di daxuyaniyê de hate diyarkirin ku tê xwestin pirsgirêka kurd bi polîtîkayên înkar û îmhayê çareser bikin û ev yek ne çareserî ye
Nûnerên platformên demokrasiyê yên 21 bajarên Amed, Êlih, Wan, Dêrsim, Şirnex, Sêrt, Elezîz û Mêrdîn jî di nav de bi armanca şermezarkirina girtina nûnerên gelê kurd li Deriyê Çiyê yê Amedê daxuyaniyek dan çapemeniyê. Girseya ligel hewayê sar jî gihişt hev, dowîzên, "Ji duh heta îro çi guherî", "Çareserî di  demokrasiyê de ye", "Em hewildana kelepçeyî naxwazin" "Kelepçe li îradeya me nayê xistin" û wêneyên BDP'yiyan ên bi kelepçeyî hildan.

Girseyê bênavber sloganên, polîtîkîkayên AKP'ê yên zordestiyê şermezar dikin avêtin. Li ser wesayîta anonsê ya BDP'ê Endama Înîsiyatîfa Dayîkên Aştiyê ya Amedê Gulistan Erek axaftinek kir. Erek balkişand ser gotinên Serokomar Abdullah Gul û operasyonên tasfiyekirina îradeya gelê kurd ên piştî van gotinan dest pê kirîn. Erek bi pirsa, "Hewildana we girtina nûnerên gelê kurd û bêdengkirina îradeya gelê kurd e?" axaftina xwe bi dawî kir.

SERÎ NATEWÎNIN
Hevseroka KCD'ê Yuksel Genç jî di axaftina kirî de operasyona li hemberî nûnerên gelê kurd bi tundî şermezar kirin û ev yek şibande darbeyê. Genç wiha got: "Li hemberî zordariyên li ser kurdan tên meşandin li rojavayê Tirkiyeyê derdorên demokrat jî bêdeng dimînin. Lê em li kuçeyan dê vê darbeyê qebûl nekin. Vî gelê Darbeya 12'ê Îlonê jî dît û li hemberî tu zordariyan serî nadanê. AKP behsa darbeyan dike lê ev darbe niha bi destê AKP'ê li ser kurdan tê meşandin." Piştre jî daxuyaniya li ser navê 330 nûnerên saziyên civakî hatiye amadekirin, hate xwendin. Di daxuyaniya ji hêla Serokê Şaxa SES'ê ya Amedê Vahdettîn Kiliç ve hate xwendin de wiha hate gotin:

'AKP DAWIYA XWE TÎNE'
"Piştî êrîşên li hemberî îradeya gelê kurd, êrîşên li dijî karker û karmendan jî zêde bûne. Hikûmeta AKP'ê li hemberî daxwazên hemû derdorên mexdûr guhê xwe girtine. Lê li hemberî hemû   zordariyan jî gelê kurd dê ji   daxwazên xwe yên rewa û   demokratîk dest bernede. Ku AKP li bendê be ji van polîtîkayan çareseriyek derkeve xwe dixapîne. Ev polîtîka dê hem bi Tirkiyeyê hem jî bi AKP'ê bidin windakirin. AKP bi israrkirina di van polîtîkayan de dawiya xwe tîne."
Kiliç bang li hemû derdorên demokrat jî kir ku li hemberî   van polîtîkayan bêdeng nemînin û têkoşîna demokrasiyê bilind  bikin.