ENQERE (DÎHA) - Piştî bûyera Ugur Kaymaz (12) û bavê wî Ahmet Kaymaz ku di 21'ê Sermaweza 2004'an de li ber mala xwe ji aliyê polîsan ve hatibûn kuştin, cara yekem dîmenên ku 2 saetan piştî bûyerê hatine kişandin, hatin bidestxistin.
Di dîmenan de tê xûyankirin ku hîn xwîn ji pozê Ugur Kaymaz tê û ev yek jî pirsa, "Gelo Ugur hîn dijiya?" tîne bîra mirov. Dîsa di dîmenan de tê xuyakirin ku Ahmet Kaymaz li aliyê çêpê yê Kamyoneta xwe, Ugur jî li aliyê rastê hatiye kuştin. Ev yek jî îfadeyên şahîdên bûyerê yên wekî, "Ugur û bavê xwe ji bo ku eşyayên xwe têxin wesayitê ji malê derketin" piştrast dike.

Dîmenên kuştina Ugur Kaymazê 12 ku bi bavê xwe re di 21'ê Sermawêza 2004'an de li ber mala xwe ji aliyê polîsan ve bi 13 guleyan hatibû kuştin, ketin destê DÎHA'yê. Di dîmenên ku ji aliyê polîsan ve 2 saetan piştî bûyerê hatine kişandin de, li gel daxûyaniyên Walîtiya Mêrdînê ên wekî, "Dê bi ser qereqolê de bigirtana" û "Ji ber ku bi çekan bersiv dane banga 'bisekine' ya polîsan, hatine kuştin", tê dîtin ku tu îşarêtên pevçûnê nîn in. Di dîmenan de guleyên ku hemû li derdora cesedên Ugur û bavê wî Ahmet Kaymaz berhev bûne, balê dikişîne. Tankêra mazotê ya ku ji aliyê Ahmet Kaymaz ve dihat bikaranîn a bi plakeya 73 SD 977 ku hatibû diyarkirin Ugur û bavê xwe ji bo ku eşya deynin erebeyê derketine derve û li wir hatine kuştin di dîmenan de cîh digire. Tê dîtin ku tu gule li erebeyê neketine. Li gel ku Ugur û bavê wî li aliyê çep û yê rastê yê erebeyê hatine kuştin jî, tu gule li erebeyê neketine. Ev jî îdîaya "Maktul hedef hatin girtin û hatin kuştin, tu pevçûn derneketiye" bihêz dike.

Gelo Ugur dijiya?















Sifra li malê

Dîsa polîsan piştî ku cihê bûyerê kişandine, avêtine ser mala Kaymazan û ji mal jî gelek dîmen kişandine. Di dîmenan de tê dîtin ku mal hatiye belawelakirin û li erdê jî sifreyeke ku xwarin li ser heye û hê tu kesî dest nedaye xwarinên li ser sifreyê, balê dikişîne. Li ser sifrê, li gel tebaxeke mezin a girarê, çend tebax tirşik û 4 heb jî kevçî hene. Ev dîmen jî, îfadeyên malbata Kaymaz ku piştî bûyerê gotibûn, "Ugur û bavê xwe çubûn ku eşyayên xwe deynin hundirê wesayîtê û dê piştre bihatana, xwarin bixwarina" bihêz û piştrast dike. Dîsa dîmenên wêneyê Parlamenterê DEP'î Mehmet Sîncar ji aliyê polîsan ve bi caran hatine kişandin. Dîsa di heman dîmenan de tê dîtin ku polîs li pêşiya wesayîta Kaymazan lêgerînê dikin, ji vir çenteyekî derdixînin û encama lêgerîna di vî çenteyî de, dibêje "Ji bilî cilan tu tişt tuneye" û vana di zabitnameyê de dinivîse.

Mehekê piştî bûyerê dîsa dîmen

Di dîmenan de detayekî balkêş jî ew e ku polîsan mehekî piştî bûyerê, di 21'ê berfanbarê de di saetên serê sibê de ji mala Kaymazan û ji cihê bûyerê cardin dîmen kişandiye. Di van dîmenan de jî ji hemû aliyên malê û ji cihê bûyerê ji derdorê, dîmen hatine kişandin. Lê nayê zanîn ku ev dîmenên mehekê piştî bûyerê û beriya destpêkirina danişîna yekemîn ji bo çi hatine kişandin.




25.09.2006

DIHA