DIHA 01.03.2008 Hevseroka DTP'ê Emîne Ayna ku di mitînga 8'ê Adarê Roja Jinan a Cîhanê ya li Pirsûsê tê lidarxistin de axivî, diyar kir ku Serfermandarê Giştî Yaşar Buyukanit, bi daxuyaniya xwe ya têkildarî operasyona dersînor, îtîraf kiriye ku bi operasyonan ev pirsgirêk nayê çareserkirin û wiha got: "Ev bi salan e em vê yekê dibêjin. Ev gel dibêje êdî bes e. Vî dengî bibihîzin nexwe gel dizane ka dê çaseriya xwe çawa pêk bîne." Ayna, bang li Erdogan jî kir û got, "Erdoganê ku di firsendê de dilawertiya xwe nîşan dide, bi rastî jî heke çareseriya te hebe nîşan bide."
Mitînga bi munasebeta 8'ê Adarê Roja Jinan a Cîhanê, ji aliyê Tevgera Jina Azad û Demokratîk (DOKH) ve li Navçeya Pirsûsa Rihayê bi beşdariya bi dehezaran jinan tê lidarxistin, bi axaftinan dom kir. Hevseroka DTP'ê Emîne Ayna, di mitîngê de axivî li ser operasyona bejayî ku duh bidawî bû, rawestiya. Ayna, derbirî ku Tirkiyeyê operasyonek bejayî pêk anî û got ku ew ê PKK'ê bi qedinînin û ev tişt gotin:

'Heke ev maceraperestî nebe çiye'

"Serokwezîr Erdogan, dema tezkere anî meclîsê, daxuyaniyek da û got 'em macereperest nîn in'. Pekî îro tişta hatiye kirin heke maceraperestî nebe, çiye? PKK na qede. Wê demê çareserî operasyon nîn e. Duh Serfermandar daxuyaniyek da, piştre jî got ku 240 gerîla kuştine û 24 jî leşker hatin kuştin. HPG jî dibêje 81 leşker û 5 gerîla. Kîjan dibe bila bibe, mirov mirin. Ha leşker ha gerîla, ciwan di 20 saliya xwe de mirin. Encama wê çibû bi sedan bombe û gule. Di destê we de ji bilî mirinê çi heye? Êdî bes e." Di vê navberê de axaftina Ayna, bi dirûşmên wekî, "Kujeyer Erdogan", "PKK gel e gel li vir e" hate birîn.

Banga ji bo Erdogan: Heke çareseriya te hebe nîşan bide

Ayna, li ser paketên çareseriyê yên heta niha hatine derxistin jî rawestiya û wiha pê de çû: "Ev bi salan e, paketên veşarî yên hikûmetên li Tiriyeyê hene. Em nizanin di hundirê wan de çi heye. Piştî her mirinê paketek heye. Ji her paketekê ji bilî derew, xapandin, çek, birçîbûn, xizanî û mirin çi derdikeve? Divê îro mirov bibîne ku tenê çareseriyek heye û ew jî guhertina mantiqa 'yeknavendîbûnê' ye." Ayna, bang li Erdogan jî kir û got, "Erdoganê ku di firsendê de dilawertiya xwe nîşan dide, bi rastî jî heke çareseriya te hebe nîşan bide."

'Serfermandar îtîraf kir'

Ayna, daxuyand ku Serfermandarê Giştî Yaşar Buyukanit, bi daxuyaniya xwe ya têkildarî operasyona dersînor, îtîraf kiriye ku bi operasyonan ev pirsgirêk nayê çareserkirin û wiha got: "Ev bi salan e em vê yekê dibêjin. Ev gel dibêje êdî bes e. Vî dengî bibihîzin nexwe gel dizane ka dê çaseriya xwe çawa pêk bîne."

'Divê hûn rastiyê bibînin'

Anya, ji bo çareseriya pirsgirêka kurd jî ev tişt gotin: "Divê nansaneme û perwerdehiya bi zimanê zikmakî di makezagonê de bê mîsogerkirin. Ev jî bi guhertina makezagonê pêkan e. Her wiha divê sererastkirin bên kirin ku gerîla tevlî jiyana civakî bibin. Dîsa divê şertên Girtîgeha Îmraliyê bêne sererastikirin. Kurdên li vî welatî dijîn, di mijara Birêz Ocalan de hesas in û divê hûn vê bibînin."

'Heta dengê me nebihîsin em nawestin'

Ayna, derbirî ku îro li meydana mirov tên pelçiqandin û pirsa "Hûn ne westiyan?" ji girseyê kir. Girseyê jî bi yekdengî bersiva "na" da. Li ser vê yekê Ayna wiha got: "Heta aştî û çaseresî pêk neyê, heta ku Enqere û Wanshîngton dengê me nebîheze em na westin. Li çiyayên ku hûn operasyonan li dar dixin zarokên van mirovan hene."

Piştî Ayna xwîxka Rêberê PKK'ê Abdullah Ocalan bi kurdî axivî û ev tişt gotin: "Bila leşker û gerîla ne mirin. Ev 7 sal in em aştiyê dixwazin. Bila kes nemirine êdî bes e."
Mitîng, bi stranên hunermend Rojda dom dike.

(xo/ru)