Politika-Bi belgeyan derkete holê ku MÎT’a tirk li Tirkiyeyê perwerdehiya sûîkastê dayê 44 tirkmenan û ew ji bo kuştina Celal Talabanî û hevsera wî Hîroxan şandine başûrê Kurdistanê. Îtîrafkar got ew li midûriyeta polîsan a Vatanê perwerde bûne.



Ji devê sîxurekî -1

Nûçeya Azadiya Welat ya der barê sûîkasta li hemberî serokên kurd de, rast derket. Azadiya Welat di 12’ê tebaxê de nûçeyeke bi ser navê ‘Li dijî serokên kurd plana êrîş û sûîkastê’ dabû û ev nûçe bûbû manşeta rojnameya Azadiya Welat. Di nûçeyê de hatibû destnîşankirin ku ji bo kuştina serokên kurd ên li Herêma Federal a Kurdistanê, tirkmen ji aliyê JÎTEM û MÎT’a tirk ve têne perwerdekirin. Li gorî belgeyên ku rojnameyê bi dest xist, di serî de Serokdewletê Iraqê Celal Talabanî, hevsera wî Hîroxan û ji bo ku serokên kurdan bikujin, li Stenbolê 44 tirkmen hatine perwerdekirin.

Hevkariya Tirk û Ereban

Beriya niha me û Azaddiya Welat gelek caran bi nûçeyên xwe yên cuda cuda aşkera kir ku Tirkiye li başûrê Kurdistanê hewl dide ku bi destê sîxurên xwe aloziyên mezin pêk bîne. Bi taybetî jî ji hin çavkaniyên pê bawer û saxlem hatibû ragihandin ku Rêxistina Îstixbaratê ya Tirkiyeyê (MÎT) hin tirkmen, ereb û kurdên ku hevkariya Tirkiyeyê dikin, perwerde dike û ji bo çalakiyên sûîkastê dişîne Herêma Federal a Kurdistanê. Her wiha bi riya hin hêzên li herêmê, dixwaze qetlîaman li başûrê Kurdistanê pêk bîne. Vê yekê jî zêdetir bi riya hêzên îstîxbaratê yên li herêmê pêk tîne.

Pasaporta Kanadayê

Yek ji van sîxurên MÎT’a tirk ku li Stenbolê hatiye perwerdekirin, beriya 10 rojan li Kerkûkê hate girtin û gelek rastiyên têkildarî mijarê raxistin ber çavan. Kesê bi navê Mihemmed Seîd Elî ligel pasaporta ku ji dewleta Kanadayê hatiye standin û gelek belgeyên din ji aliyê asayîşa Kerkûkê ve hate girtin. Rayedarên Ewlekariyê yên Hikûmeta Herêma Kurdistanê dan zanîn ku ew guman dikin, pasaporta Mihemed Seîd Elî ku ya ji Kanadayê hatiye standin, sexte be û ew bi riya hêzên navneteweyî yên îstîxbaratê hatibe bidestxistin.

Îtîrafên berfireh kirin

Derket holê ku ev kes yek ji kadroyên perwerdekirî yên MÎT’ê ye û ew di bin navê endamtiya partiya tirkmenan xebatên xwe yên nepenî dimeşîne. Mihemmed Seîd Elî piştî hate girtin, fermanên ku MÎT’a tirk dane wî û kesên ku ew perwerde kirine yek bi yek vegotin. Belgeyên di destê Mihemmed Seîd Elî de nîşan didin ku sîxur kengî bi çi awayî çûye Tirkiyeyê û li kîjan navendê hatiye perwerdekirin.

Dê Talabanî bikuştana

Seîd Elî, di îtirafên xwe de, aşkera dike ku dê li dijî kî sûîkastê bikirina. Elî, di îtirafên xwe de wiha dibêje: “Fuzeyên aîdê komîteya suîkastê hebûn. Talat Abdullah û Şehab Ehmed ku berpirsên qadan bûn, cihê fûzeyan dizanîn. Talat Abdullah di komputuran de karîkatûr û rismên rayedarên kurdan û bi taybet jî yê Mam Celal û hevsara wî Hîroxan li sûîkastvanan belav kir. Yê ku wan wêneyan belav dikir jî kesê bi navê Firaz Talat bû. Ew bixwe ji taxa Sînaeyê ya Kerkûkê ye. Niha di mala Talat Abdullah de 3 çekên keleşnîkof, 2 demance, yek jî serê demançeyê ya bêdeng (susturucu) û komputurek û çend CD’yên ku dîmenên sûîkastan de hene, heye.”

Komîteya sûîkastê

Mihemmed Seîd Elî ku bi eslê xwe ji gundê Kifriya bi ser Kerkûkê ye, der barê plana sûîkastê de, agahiyên bi qedr û qîmet dan. Li gorî îtirafên Elî, berpirsê kesên ku sûîkastê dikin albayek e. Seîd Elî di îtirafên xwe de wiha dibêje: “Piştî hilweşîna rejîma baasê, min bi riya kesê bi navê Şehab Ehmed Ereb têkilî bi Eniya Tirkmenan re danî. Kesê bi navê Ehmed Ereb, ez xistim Komîteya Sûîkastê. Min li vir endamên sûîkastê Talat Abdullah, Hemîd Yariz û Muqaddem Immad nas kir.”

Albay Yaşar kî ye?

Seîd Elî îtîraf dike ku piştî ku baweriya Komîteya Sûîkastê bi wî hatiye ew bi gelek kesan re daye nasandin û wiha got: “Herî dawiyê min kesekî bi navê Albay Yaşar nas kir. Ew berpirsê Komîteya Sûîkastê bû. Ji rewşa wî diyar bû ku ew ji Tirkiyeyê ye. Her wiha ew li başûrê Kurdistanê bisteh û rehet bû. Ango herêm baş nas dikir. ”

Planên sûîkastê

Li gorî îtirafan kesên ku dê sûîkast pêk bînin, bi wesayîtekî bi markaya Dolphîn ku rengê wê spî ye, dibin bajarê Zaxoyê û li wir bi kesekî re didin nasandin. Seîd Elî, wiha behsa wî kesî dike: “Ji min re gotin ew kes ji Tirkiyeyê ye û endamê MÎT’ê ye. Her wiha gotin berpirsê hemû Eniya Tirkmenên li Iraqê ye. Pasaporta Iraqê li ser hebû. Wî kesî ez çend caran bi xwe re birim Bexda, Hewlêr û Silêmaniyê. Wî kesî ji min re got; tu êdî ajokarê Komîteya Sûîkastê yî. Piştre ez xistim civînên bi dizî. Di civînan de planên sûîkastê dihatin kirin.”

HEWLÊR

22.08.2007