Politika-Serokwezîra Elmanyayê Angela Merkel, ku Serokatiya Demê ya Yekitiya Ewrûpayê dike, diyar kir, ku rewşa Ocalan ji aliyê Elmanyayê ve ji nêz ve tê şopandin. Merkel xwest, hemû girtîgehên li Tirkiyê di çarçoveya peymanên navnetewî de ji kontrola heyetên serbixwe re werin vekirin.


Serokwezîra Elmanyayê Angela Merkel, bersiv da nameya Seroka Komeleya Demokrasî û Huqûqê ya Navnetewî MAF-DAD Annî Pûes a li ser rewşa tenduristiya Rêberê Gelê Kurd Abdullah Ocalan.

Merkel: Em Îmraliyê ji nêz ve dişopînin

Serokwezîra Elmanyayê Angela Merkel di nameya xwe de diyar kir, ku rewşa Ocalan ji nêz ve dişopînin û ev xal destnîşan kir: ‘Komara Federal a Elmanyayê her bûyerên der heqê Ocalan de diqewimin ji nêz ve dişopîne. Dixwazim ji we re bêjim der heqê mijara jehrdayînê de her rêya huqûqî li pêşiya we vekiriye.’

‘Divê hemû girtîgeh ji kontrolê vekirî bin’

Merkel di dewama nameya xwe ya bersivdayînê de diyar kir, ku divê hemû girtîgehên Tirkiyê ji kontrola heyetên serbixwe re vekirî bin. Ji bo pêşîgirtina li êşkencê pêwîste peymanên navnetewî yên pêwendîdar bicih anîn.

MAF-DAD dosya da Merkel

Nameya seroka yekemîn a Maf-Dad’ê Parêzer Annî Pues, di 17’ê Adara sala 2007’an de radestî Serokwezîra Elmanyayê Angela Merkel hatibû kirin. Di nameyê de behsa rewşa tenduristiya Ocalan hatibû kirin û her weha dosyayeke dorfireh hatibû pêşkêşkirin.

22.05.2007